M’hemmx aħjar
milli tgħix komdu... sufan, friġġ, forn, arja kkondizzjonata, lki, xawer,
sodda, komodina, televixin, kompjuter, internet mejda tal-kċina... kollha
affarijiet li jagħmlulna l-ħajja komda b’livelli differenti... skont kemm
tonfoq u kemm tiflaħ tonfoq, fi spazju ta’ dar b’saqaf.
Il-kumdità
inkejluha għax nafu xi jfisser in-nuqqas tagħha jew, fil-biċċa l-kbira, permezz
tal-kumdità tat-televixin, rajna min hu inqas komdu minna, aktarx xi ħadd li m’għandux
televixin.
Nafu xi tfisser
kumdità tant li xi drabi nkunu tant mhedijin fiha li l-affarijiet li jdejquna
ninjorawhom bil-frażi perikoluża, “U ija, l-aqwa li komdu.” Ninjorawhom bħal
dik iż-żrara f’żarbun komdu li nibqgħu mixjin fih sakemm nagħtu tnejn bis-sieq
biex iż-żrara tersaq u nkomplu mixjin biha. Nibqgħu mixjin biż-żrara għax
iż-żarbun komdu... u ma nneħħihx għal ftit sekondi biex inneħħuha.
Ilkoll ninqabdu f’sitwazzjonijiet
komdi f’ħajjitna... sitwazzjonijiet li għalkemm ikun fihom dik iż-żrara, ġieli
nħalluhom tant li ż-żrara ssir selħa. Ninqabdu f’sitwazzjonijiet fejn ma
nibdewx naraw opportunitajiet oħra jew nibżgħu noħduhom... għax ġo daż-żarbun
ninsab komdu... avolja tqatta’. Nibżgħu għax ma nafux xi kwalità ser ikun
iż-żarbun il-ġdid jew kemm ħa jwassalna bogħod.
Li tibdel żarbun
komdu bla żrar u tqattiegħ huwa kapriċċ, aktarx bla bżonn. Però kemm
lest tinża’ ż-żarbun għal ftit biex tneħħi ż-żrara? Kemm lest tibdlu meta
jitqattgħalek?
Jew ġa tqatta’?
