Mażra

Qed inħossni nifga
Qed inħossni magħluq
Ġo gaġġa maħnuqa
Bit-trab u riħa t’għeluq.

Qed inħossni fgat
Qed inħossni nħnaqt
Bla arja in-nifs qtajt
Iftħuli għax issa xbajt!

Mar-radd tas-salib
Jibda t-tħaffir
Biex jibdielek il-ġurnata
B’ħafna tgergir

Tirkeb fil-karozza
Fit-traffiku teħel
Jekk timxiha
Il-pulmun isir demel

Qed inħossni nifga
Qed inħossni maħnuq
Ma fadalx arja
Kullimkien għeluq

Konkos kull fejn tħares
Torrijiet bla pjan
Flok siġar krejnijiet
Jiżbokkaw sas-sema kaħlan
Dawn saru l-veduta ewlenija
Ta’ dil-gżira li tant kellha ġmiel
U bi storja kbira tant hija mogħnija.

Illum għandna Malta tal-fuljetti
Li jżur it-turist sakemm jippermetti
U Malta tagħna l-Maltin
Li qisu apposta ma nifqux nagħmlulha l-ħażin.

Qed inħossni fgat
Qed inħossni nħnaqt
Bla arja in-nifs qtajt
Iftħuli għax issa xbajt!

Titkellem qas tista’
Tgħid x’tgħid jgħajruk li int kontrihom
Iqumu għalik qisek lil ommhom ħadtilhom
Qalulna wkoll li l-libertà għandna tal-kelma
Sakemm ġurnalista tajjru mas-sema

Ilħaqna l-punt tal-ebda ritorn
Fejn il-kilba għall-but
Tħalltet mat-tron
U “Kull fejn tħares tara l-ħallelin”
Basta s-slaleb inroddu
U nieħdu l-ġuramenti quddiem il-Bambin

Dil-mażra fgatni
Ħallietni bla leħen
Nifs qas fadalli
Qalbi...nqatgħet

Illum xejn ma jsabbarna.

Tlifna mhux biss ġurnalista b'mod barbaru

Imma magħha ġiet mhedda l-libertà tal-espressjoni, id-demokrazija u l-ġurnaliżmu.

Illum Malta tilfet. Illum għandna martri tal-pinna. 

Illum Daphne ngħaqdet ma' Raymond u Karin.

J'Alla l-ġustizzja tgħinek tistrieħ fis-sliem.

J'Alla.

#RIP #DaphneCaruanaGalizia #Malta #FreeSpeech #FreedomOfSpeech #JienaDaphne

L-Għanja tal-Blata

Tella' ċint, addio bankina
Warrablu ħa jtella' dil-qaddisa binja
Jitmellaħ jekk intx
F’siġġu tar-roti
Ġenitur b'tarbija
Anzjan bil-bastun
Għax hekk iddeċieda dal-mingħul ta’ muntun.

It-Tnejn is-sewda it-Tlieta l-griża
Imma aħna noħorġu s-sewda
Kull meta jiftlilna.

Ġużi ħareg bil-kelb
Li nqeda fuq bankina
Tessie tagħha ġabritu f’borża
Imma ħallietha fin-nofs qisha f’vetrina.

Fit-toroq tagħna tlaqna dawra
Aktar mibnija għaż-żwiemel
Milli għal terz ta’ miljun vettura

Għaddej bit-trakk, Ara f’għajnu dieħel oneway
Għax ħa jaħrablu, ma tarax, Itawwal daqxej’?!
Tal-mutur għaddej żiffa, ara! Serrep bejn karozza, u issa oħra
Qabeż karreġġata avolja b’linja doppja
L-aqwa li qisu Sherlock...
L-ewwel li qasamlu, xeħtu fuq Facebook!
Bil-karozza qisna ċuċu trejn
M’hemmx li nimxu, għaddew sagħtejn
Xi stop sign hu? L-aħmar xi jfisser?
Ejja ‘bqa’ għaddej ħa naslu
Wasalna, ipparkjajna…
Tfajtha fuq l-isfar, f’kantuniera
X’ala biebi mir-rampa,
Dik għal dawk u mhux għalija
Il-warden xalata jfakkar Jum iċ-Ċitazzjoni,
Wara li pparkja doppju biex jixtri żewġ pastizzi u flixkun Kinnie.

Għandna x-xemx,
Bil-wisq u bl-abbundanza,
Il-ftit siġar li kellna
Qed inneħħuhom b’arroganza
Il-baħar lewn in-nir
Minn ħalqu ħierġa għajta b’ragħwa
“Ħammiġtuni biex il-ħut isir kbir!”.

Ingergru għall-barranin
Kemm aħna boloh x’waħda din?
Niftaħru bit-turiżmu
U kemm xogħlijiet b’pagi tajbin jeżistu
X’jiġri minn pajjiżna jekk dawn jitilqu?

Il-liġijiet linji gwida
Japplikaw għal ftit u mhux għall-bqija
Infurzar skont kif jinzerta
Sew jekk l-aħħar tax-xahar
Jew wara xi rapport f’gazzetta.

Fil-politika ejja ma nidħlux
Dik saret farsa minn hawn sal-ibgħad xmux
Membri tal-Gvern b’kontijiet moħbija
Bl-oppożizzjoni magħquda fi ġlieda għat-tmexxija.

Ngħixu f’Repubblika imsejħa ta’ Malta
Fejn dnub ftit tikber il-banana
Il-għaliex ma aħna xejn ħlief biċċa blata.
Li b'kilba mill-ġmiel tagħha neżżajna.

Għaġeb u Teftif

Tbus lill-mara
Tbus lit-tfal
Tmur sax-xogħol
U lura d-dar

Tidħol f’rutina
Qas taf kif
La ħin għall-għaġeb
U inqas għat-teftif

Dħalt Facebook Twitter u Instagram
Ara min miet, iżżewweġ u wiled!
Ara dix-xadina kemm hi tad-daħk
Kemm ġew tal-futbol? Taf li qas naf!

Tidħol f’rutina
Qas taf kif
La ħin għall-għaġeb
Imma sibt ftit għat-teftif

Il-Kristu! Rajthom tal-bergers?!
Qas temmen x’għaġeb
Lil-Luanda sallbuha għax serqet portmoni
Lil Ali ma ħamluhx għax mar isalli
U ħaġġru lil David għax iżżewweġ lil Gary.

Tidħol f’rutina
Qas taf kif
Sibt ħin għall-għaġeb
U anke għat-teftif

Tbus lill-mara għax dieħla torqod
Lit-tfal bisthom kienu ġà reqdin
Dħalt f’rutina qas taf kif
Ommi ma kemm taħli ħin!

Ġanna ta' Valent

Fi Triq il-Ġdida f’Ħal Luqa kont tara mara tarmi s-saħħa, li malli tibda l-ewwel longa sajfija bħal koċċ nies oħra fir-raħal kienet toħroġ is-siġġu fuq il-bankina, erħilha tgħid kelmtejn ma’ dak u mal-ieħor, ġirien u nies għaddejja bil-pass minn ħdejn id-dar umli tagħha bieb ma’ bieb mal-klinika ċkejkna tat-tabib Mifsud Bonnici.

Imwielda nhar l-1 ta’ Novembru 1915, kienet mara li batiet imma qatt ma qatgħet qalbha. Meta żewġha, Valent, erħielha lejn l-Amerka għal 24 sena sħaħ biex jgħajjex lill-familja f’Malta, Ġanna baqgħet hawn trabbi l-erba’ wlied tagħhom minn sitta li baqgħu ħajjin. Kienet tilfet tnejn minn uliedha… Georgia ta’ ħdax-il xahar u Fredu li ta’ seba’ snin ittajjar minn fuq il-bankina minn karozza tal-militar Ingliż quddiem darha. Iżda minkejja d-dieqa ta’ dawn it-telfiet, qatt ma ħarset lura b’disprezz lejn il-ħajja u wliedha telgħu nies tar-rispett.

Ġanna Muscat kienet Qormija u ara ma jfettillekx tmissilha lil San Ġorġ għax lixxa ma tħallihilekx żgur. Iżda kienet tirrakkontalna kif meta waslet biex tiżżewweġ lil Valent… fetlilhom qasmu l-parroċċi f’Ħal Qormi u t-triq fejn kienet toqgħod ġiet bl-eżatt tagħmel mal-parroċċa l-ġdida ta’ ħadd ħlief San Bastjan. Xi traġedja! Dak iż-żmien mhux bħal-lum… Żwieġ kien isir biss fil-parroċċa tal-għarusa. Jingħad li li tiżżewweġ barra mir-raħal jew f'parroċċa oħra kien sinjal li ridt taħbi xi ħaġa. Ma hemmx x’tagħmel. Biex saret 'Ġanna ta’ Valent' kellha tiżżewweġ fil-knisja ta’ San Bastjan.

Fil-gwerra diġà kienet omm. Rakkonti ta' kemm kienu jieħdu refuġju fix-xelter li kienu bnew il-ġirien,il-Victory Kitchen u oħrajn ma kinux jonqsu.

Fost l-istejjer leġġendarji ta’ Ġanna… Jingħad li meta kienet żgħira legilget nofs flixkun pitrolju, li kien jitħalla fuq il-mejda tal-kċina biex jixgħel xi lampa ċkejkna hekk kif tfixklitu ma’ nbid. Kienx inbid jew pitrolju Alla biss jaf, imma dik il-lejla Ġanna kienet raqdet fil-fond bħal blata imma qamet qisha ħassa.

Kellha dar umli, b’kera mingħand il-ġara. Is-sular ta’ fuq ftit niftakru… Kellu bieb dejjem imsakkar jinfed għand l-istess ġara… Bieb ieħor jieħdok għal speċi ta' bejt jagħti għall-bitħa. Il-bitħa b’bir li qatt ma naf li naqaslu l-ilma, qsari kemm trid, kaldarun taż-żingu u fiż-żmien kien hemm il-fniek u xi gidi jew ħaruf li kien iġib Valent. Dik il-bitħa li tgħidx kemm lgħabna fiha! Kont toħroġ fiha minn loġġa li tasal għaliha mill-kamra mdaqqsa tal-ikel, b’rediffusion fuq is-sajdbord, gwardarobba u friġġ. Biswitha kċina li jekk ikun hemm tnejn min-nies fiha, komdi ma kinux joqogħdu. Iżda minnha kien joħroġ ikel mill-iprem. Ir-ross il-forn, qaqoċċ mimli, imqarrun bil-qiegħ miksi bil-patata mqatta’ rqiqa, brodu tat-tiġieġ u pulpetti tal-bullubijf, majjal mixwi bil-patata l-forn...niftakar fihom nibda nliegħeb. U ovvjament ma kinux jonqsu dik it-tazza Kinnie jew 7Up.
Fil-kamra tat-taraġ kien hemm is-sodda tagħha u sodda oħra. It-teleforn, li minnu konna ġieli nissendikaw, nisimgħu konverzazzjonijiet bejn min jaf min, u li aktar tard inbidel għas-sett tat-telecare kien fuq komodina bejn is-sodod. Kuruna tar-rużarju mdendla mat-tustiera ma tonqosx, u mal-ħajt, faċċata, vetrina bit tazzi u remiżorji oħra… teżor ċkejken għal xi regettier.
Imbagħad toħroġ fis-salott … l-ewwel kamra mill-bieb ta’ barra. Ma kienx salott minn dawk li qatt ma jintuża. Kien hemm televixin, mera u sufan taħtha, b’marka ta’ ħarqa ta’ sigarett ta’ Valent, ritratt tal-preċett ta’ Fredu kważi mas-saqaf u ieħor taż-żwieġ li sar fil-knisja ta’ San Bastjan. Fuq is-sajdbord żiemel tal-injam u koċċ inkwatri ta' kull daqs b’ritratti li jlaqqgħuk mal-familja kollha. Fir-rokna tieqa bil-persjana u taħtha kien hemm il-pultruna ta’ Ġanna. Mhux darba u tnejn li kienu jieqfu jkellmuha hekk kif il-bieb kienet tħallih imbexxaq u ġieli anke miftuħ. Fil-festa ta’ Sant’Andrija s-salott kien isir estensjoni tal-każin. Minkejja li kienet soda fl-opinjoni politika tagħha, politiċi ta’ kull naħa waqt ir-ronda mal-kostitwenti kienu jieqfu jkellmuha u bejn grokk u ieħor jeħlu għandha.

Meta ommi kellha lil ħija u lili erħilha taqbad tal-linja biex tagħti daqqa t'id lill-ommi. Tgħaddi minn tas-Sliema kienet tiftakar fi New York fejn kienet telgħet ħdejn Valent. Dan meta l-Preluna kienet l-aktar binja prominenti max-xatt. Mur ġibha titla' llum!

Ġanna romlot ftit snin biss wara li Valent, li kien idaħħan b'mod li jġiegħel ċumnija tgħir, kien ġie lura mill-Amerika fejn tnax-il sena qabel diġà kien tfejjaq mill-ewwel kanċer fil-pulmun. Romlot imma għaliha l-ħajja kompliet ukoll. Kompliet tgħin fejn setgħet u lil kull min setgħet. Jekk mhux bl-għemil, bil-karità. Fuq kollox Ġanna qatt ma waqfet tħobb, qatt ma bagħdet lil ħadd. Għalkemm min jirrabjaha ma kinitx tħallih mingħajr ma tibgħatu jżur ‘l hawn jew ‘l hemm.

Fi żmien il-baġit erħilha titkellem dwar il-baġí qisu xi amorin. Kull meta taqbel ma’ xi argument kienet toħroġ xi “U ngħid!” b'dik it-tkarkira Luqija li wirtet maż-żmien. U ma kinitx tonqos il-“Qulla!” minflok iżżarrat xi waħda jekk tkun bihom.

Konna mmorru nhar ta’ Sibt nżuruha u mmorru dawra fejn joħodna r-riħ fis-Suzuki 800 ta’ missieri. Wara li tatha l-ewwel puplesija li ħasditna mhux ftit imma li rkuprat minnha kompletament, ommi u z-zijiet kienu joħdulha l-ikel waqt li s-servizz tal-meals on wheels kienet waħda minn tal-ewwel li żanżnitu. Żewġ puplesiji u sieq inqas wara, Ġanna ta’ Valent mietet fl-età ta’ 79 sena…nhar id-9 t'Ottubru 1995, ftit jiem biss qabel misset it-80.

Ġanna ta’ Valent ma hija ħadd ħlief in-Nanna Ġanna. Li l-karattru żbukkat u spirtu pront xi ftit jew wisq wiritnih kollha kemm aħna fil-familja. Rabbiet tfal b’karattru b’saħħtu u qalb tad-deheb u wliedha hekk rabbewna wkoll. U hekk aktarx inrabbu lill-uliedna.

In-Nanna Ġanna ħalliet biss memorji sbieħ f'moħħna u f’qalbna u dawn kienu ftit milli niftakar b’għożża u nġorr miegħi kuljum anke jekk id-dettalji żgħar bdew xi ftit jew wisq jisfumaw ukoll. Persważ li jekk tkellem nies li kellhom x-xorti jafuha bħali u li gawdewha iktar minni, ser jgħidulek aktar affarijiet u oħrajn differenti wkoll.

Ta’ dan u aktar, grazzi Nann. Sakemm nerġgħu niltaqgħu!

Omm il-Wegħdiet Kollha

Iż-żewġ naħat għandhom proposti, proposti tajbin, oħrajn x’wieħed jista’ jikkritika, oħrajn li għandhom fejn jitranġaw u jistgħu jkunu aħjar, oħrajn jagħtu impressjoni li huma costed, oħrajn inqas. Hemm ħafna proposti… iżda hemm wegħda, jew aħjar sett ta’ wegħdiet, li trid il-gazz biex tipproponihom, speċjalment meta taf li jekk ħa tkun fil-Gvern ħa tiddiċentralizza l-poter fdat lilek stess… dan is-sett ta’ proposti jwiegħed li Titnaddaf il-Politika billi fost oħrajn: 

• Tinħatar Konvenzjoni Kostituzzjonali biex tibda proċess ta’ bidla fil-Kostituzzjoni sabiex jissaħħu l-istrutturi u l-organi tal-Istat, inkluż l-indipendenza tagħhom mill-Gvern tal-ġurnata. Fost l-oħrajn, tiddaħħal regola li l-ħatriet fl-ogħla karigi tal-istat isiru b’żewġ terzi fil-Parlament. Sabiex ma niġux f’pożizzjoni li dawn il-karigi jibqgħu vojta għax ma jkunx intlaħaq vot ta’ żewġ terzi fil-Parlament wara darbtejn, it-tielet vot ikun b’maġġoranza sempliċi sabiex il-ħatra tkun tista’ ssir. 

  

  "Tiddaħħal regola li l-ħatriet fl-ogħla karigi tal-istat
  isiru b’żewġ terzi fil-Parlament."

  
  
• Jinħatar minnufih Kummissarju tal-Pulizija ġdid u jingħata bidu għal investigazzjoni tal-każi ta’ korruzzjoni li twassal biex titwettaq ġustizzja. Dan il-Kummissarju ser jinħatar b’kuntratt temporanju sakemm jgħaddi minn skrutinju tal-Parlament u jintgħażel bl-approvazzjoni ta’ żewġ-terzi tal-Kamra. 
• Tiġi ppublikata liġi biex jinħatar Maġistrat Speċjali Investigattiv dwar il-Korruzzjoni, bit-tir li din il-liġi tgħaddi din is-sena stess. 
• Jinħatar Kummissarju dwar Standards fil-Ħajja Pubblika biex ikun jista’ jħares l-imġieba tal-politiċi. Il-Membri Parlamentari jingħataw l-għażla li jkunu full-time filwaqt li titneħħa l-prattika li Membri Parlamentari jew qraba tagħhom jew soċji magħhom f’negozju jinħatru biex imexxu bordijiet pubbliċi. 
• Tinħatar Kumissjoni Nazzjonali li tistudja l-finanzjament u n-nefqa tal-partiti politiċi u kif dawn jistgħu jkunu aktar trasparenti. 
• Jidħol skrutinju tal-persuni li jkunu nominati bħala Chairpersons ta’ bordijiet f’awtoritajiet pubbliċi importanti permezz ta’ smigħ pubbliku fil-Parlament. 
• Ma jinħatrux uffiċjali għolja tal-partiti politiċi f’positions of trust mal-Gvern jew fuq bordijiet pubbliċi. Ministri ma jitħallewx jimpjegaw fis-segretarjat tagħhom jew f’positions of trust membri tal-familja tagħhom jew soċji fin-negozju magħhom. Ikun hemm limitu stabbilit ta’ kemm il-Ministri jista’ jkollhom positions of trust. 

Il-proposti l-oħra ser ikunu ta’ suċċess biss jekk dawn il-proposti jiġu implimentati. Pajjiż li jagħti l-awtonomija lill-istituzzjonijiet juri li lest li jerħi l-kontroll tal-istat fuqhom u lest li jiġġieled il-korruzzjoni bis-serjetà. Dan juri li l-Istat qed joffri mezzi wkoll biex jiġġieled il-korruzzjoni u mhux biss jakkuża nies li huma korrotti. Jekk kull membru parlamentari hux ħa jkun nadif tazza jien ma nafx, u ma naħlef qatt għal ħadd, la fuq naħa u lanqas fuq oħra. Iżda li jien żgur hu, li la jinħolqu l-mezzi biex tiġġieled il-korruzzjoni, noqorbu aktar lejn Stat fejn ħadd ma hu ‘l fuq mil-liġi.

Pajjiż b’inqas korruzzjoni jiġi fdat anke b’investiment. U b’hekk ir-rota tkompli ddur mingħajr panċers. U b’hekk biss jista’ l-pajjiż ikollu flus biżżejjed biex jimplimenta l-proposti mwiegħda. Partit wieħed qed joffri din is-soluzzjoni għall-korruzzjoni u l-indħil tal-istat… għalhekk l-għażla tiegħi nhar is-Sibt 3 ta’ Ġunju hija ċara. U tiegħek?

Għażilt…

Għażilt li ma nibqax sieket
Għax ma rridx li kompliċi nkun
Le, ħabib, ħabiba, la tkunx int ukoll
Lil min fotta, tħalliħx ikun fit-tmun

Għażilt li ma nibqax sieket
Quddiem dal-ħmieġ ta’ tmexxija
Fejn quddiemi ta’ parsi jtuni
U minn wara jiddieħku bija

Għażilt li ma nibqax sieket
Quddiem istituzzjonijiet imnawra
Li ma jiħdux azzjoni
Anke jekk l-evidenza ilha ċara

Għażilt li ma nibqax sieket
Għax irrid naħseb f’binti
U fil-ġejjieni tagħha
Biex forsi tgħix f’pajjiż diċenti

Għażilt li ma nibqax sieket
Għax qed nifgaw bit-trabijiet
Ma fadalx roqgħa waħda
Li fiha mhawnx krejnijiet

Għażilt li ma nibqax sieket
Bħal ma bqajtx sieket fl-elfejn u tlettax
Meta l-arroganza u l-ħmieġ ħakem
Gvern li ħaseb li hu wieħed mit-Tnax.

Għażilt li ma nibqax sieket
Għax ma rridx li kompliċi nkun
Le, ħabib, ħabiba, la tkunx int ukoll
Lil min fotta, tħalliħx ikun fit-tmun

Le ma nagħlaqx ħalqi,
Għax jien ma ninxtarax
Jekk inti qed tigdeb, tfotti u tidħak bija
Iċ-ċekk tista’ titfgħu imqar fejn xemx ma jarax.

Le ma nżommx sieket
Għax fik, bidla ttamajt
Imma li f’għoxrin sena redgħu u tħanżru
Int fi tlieta doqt u ffangajt.

Le ma niskotx
Għax lil ta’ maġenbek hemm żammejt
Minkejja l-provi ċari dwarhom
Inti bihom għaddejt
(anke jekk bħalissa lil wieħed minnhom ħbejt).

Le, għażiż, għażiża, tibqgħux siekta
Quddiem dan il-gideb
Ftakru li l-folla sallbet lill-Imgħallem
U lil Barabba... lanqas biss tat wideb.

Qattusa għaġġelija…

...frieħ għomja tagħmel!

Waħda mill-ħames proposti "ewlenin" tal-Partit Laburista kienet waħda minn dawk ir-rigali mwegħda tas-soltu li wara li tivvota għaliha fl-elezzjoni tinduna li ma kienet xejn ħlief lixka għall-voti.

Biex niftehmu il-wegħda li fiha aħna l-ħaddiema komuni li naħdmu għal flusna, ikollna lura l-festi pubbliċi li jaqgħu fi tmiem il-ġimgħa.

Għalkemm kieku mhix idea daqstant ħażina mill-perspettiva ta’ ħaddiem… did-darba lanqas biss għadda nofstanhar li ma ltaqgħetx ma ntopp diġà l-proposta.

Ma nafx hux jien biss... imma qisu hemm daqsxejn żgħira paniku jew huma u jiktbuha qalu "U ijwa, belgħuha li neħħejt lil Konrad minn Ministru… din probabbli jibilgħuha wkoll!"

Dan hekk kif il-Kamra tal-Kummerċ fakkret lill-partiti politiċi li din il-kwistjoni hija magħluqa.

[Aġġornata fit-3 ta’ Mejju 2017] Sadanittant, l-Assoċjazzjoni tal-Lukandi u r-Ristoranti (MHRA) wkoll ikkritikat din il-proposta tal-Partit Laburista u laqqmitha bħala "insostenibbli"...

Ftit aktar tard ħarġet stqarrija mill-Assoċjazzjoni ta' Min Iħaddem li kif mistenni ukoll mhumiex favur din il-proposta. 

Hekk kif qed tibda tingħaqad koalizzjoni…

…ma tiġinix diska oħra f’moħħi ħlief din... (sintendi nispera li ma naslu qatt għall-vjolenza li ssegwi wara dix-xena tal-film Les Miserables!)

Id-Don tal-Kelma

"Mhux kull min kapaċi jikkonvinċi
qiegħed neċessarjament jgħid il-veritá."

Joseph Muscat għandu don. Id-don tal-kelma. L-aħħar wieħed li kellu don simili kien Lawrence Gonzi li saħansitra wkoll ma rebaħlux. Id-don tal-kelma, huwa dak id-don li permezz tiegħu dak li jkun jirnexxielu jwassal il-messaġġ b’mod li jwaqqaf il-widnejn, jolqtok u jġegħlek tixtarr u tomgħod il-kliem li jkun qal. Anke meta jitkellem fuq affarijiet li normalment iġegħluk tittewweb… aktarx jekk jgħidhom Joseph Muscat iġiegħlek tisimgħu u tgħid kemm qal erba’ kelmiet tajbin.

Dak però kien don, li sfortunatament għalih, għall-Partit Laburista u għall-Malta kollha, abbuża minnu. Użah biex iġiegħlna nemmnu li fid-dawl tal-iskandlu tal-Panama, it-tneħħija ta’ Konrad Mizzi bħala Ministru tal-Enerġija u Saħħa u minflok għamlu Ministru fl-Uffiċċju tal-Prim Ministru (ministru ta’ xiex!?)… kienet mossa li kienet tajba. Ġgħelna nemmnu li Keith Schembri kien indispensabbli għall-pajjiż u għandu fiduċja għamja fih. Fi żmien sena… Joseph Muscat f’għajnejja ma baqax il-persuna tad-don tal-kelma… imma s-sensar li qed jipprova jbegħlek dar mifqugħa konsenturi għax jgħidlek li għandha disinn sabiħ, u kważi kważi jġgħelek temmen li l-konsenturi joħolqu karattru ħelu għad-dar li jkun qed jurik. Jaf tispiċċa tixtriha dik id-dar. Imma dejjem tajjeb li wieħed jirrealizza li mhux kull min kapaċi jikkonvinċi qiegħed neċessarjament jgħid il-veritá. Lawrence Gonzi żgur li kellu dubji serji dwar jekk il-proġett ta’ Smart City kienx verament ħa jimpjega erbat elef ruħ sal-aħħar tal-leġislatura… u fil-fatt anke bl-iskuża (anke jekk forsi valida) tal-kriżi internazzjonali globali… ma mmaterjalizza xejn minn dak. Lagħab karta konvinċenti u rebaħ l-elezzjoni.

Hija ħasra u sfortuna, għax għal ftit żmien fil-kampanja elettorali, Joseph Muscat offra tama li l-politika f’pajjiżna ħa tinbidel… li ħa jkun hawn trasparenza u titnaddaf il-korruzzjoni. L-arma tad-don tal-kelma ġaladarba abbuża minnha… saret l-arma li qed tinfdu ftit ftit… l-arma li qed tnaqqarlu l-kredibbiltá… jekk mhux ġa naqqrithielu kollha. Jgħid x’jgħid Joseph Muscat qed jiġi ddubitat. U iva l-ħażin jgħatti ħafna mit-tajjeb.

L-iskandlu taż-żejt kien diżgustanti, u l-ħniżrijiet li saru f’ħamsa u għoxrin sena ta’ gvern Nazzjonalista, xekklu t-tajjeb kollu li kien sar. Kieku ma kienx hekk, aktarx li l-Partit Nazzjonalista għadu fil-Gvern, speċjalment meta tqis li kien Gvern li baħħar minn kriżi ekonomika globali u mill-kunflitt fil-Libja.

Illum sew jekk inhuma allegazzjonijiet biss, sew jekk hemm provi jew jekk ma hemmx… wieħed għandu jagħraf li xi ħaġa ħażina, dawn l-allegazzjonijiet fihom, mhux qisu xejn m’hu xejn. Ma tistax ma tinvestigax. Ma tistax tħalli l-ħin jgħaddi u ma tagħmel xejn. Ma tistax. Inti jekk ikollok suspett li l-ġar tiegħek qed iġib id-droga u tirrapportah… ma tmurx tieħu l-provi inti lill-pulizija imma l-pulizija hija fid-dmir li tinvestiga.

Fortunatament f’pajjiż fejn hemm demokrazija effiċjenti u sfortunatament għal min ikun irid jibqa’ ggranfat mas-siġġu tal-poter…Gvern ma jiġix iġġudikat fuq it-tajjeb biss iżda wkoll fuq il-ħażin. Iżda kollox f’idejn l-elettorat biex juża moħħu u jara x’jaqbillu hu u l-ġid komuni.

Lil Binti

Ħabbejtek mill-bidu
Qabel rajt l-ewwel ritratt
Kont għadek qisek fażola
Illum inti ġmiel iktar minn djamant

Hawn int għażiża
Bkejt l-ewwel bikja
Miegħek aħna, dmugħ il-ferħ xerridna
Miraklu mill-isbaħ li żejjnilna ħajjitna

Għadek innoċenti
U x’inhu jiġri ma tafx
Ibqa’ hekk u la tinkwetax
Tagħmilx bħal missierek…
Dak jagħti wisq każ.

Ibqa’ hekk, sabiħa
U bħal ommok kun
Mara b’qalb kbira
Li tgħin, ikun min ikun

Għandek dinja quddiemek
Li flimkien għad naraw
Dinja kbira li għad trid tibda tiskopri
Għada pitgħada durha int u ara x’toffri…

Mur binti… mur
Fuq vjaġġi ta’ fantasija
Fejn moħħok jista’ jiġri
B’bosta lwien daqs ferrovija

Oħlom binti oħlom,
U le, la tiqafx
Tħalli xejn iwaqqfek,
Jien inkun hemm warajk

Oħlom binti oħlom
U fil-ħsieb erħilha ħa ttir
Għax inti fil-bogħod għad tasal
'L hinn mill-baħar lewn in-nir.

Nibqa’ nħobbok għażiża binti
Mqar sa ma jsejjaħli l-Ħallieq
Wegħdni biss li lil ommok tweġġah
Għax bħalha qatt u ħadd ma ssib

X'naqbad nemmen?

Imma x'taqbad temmen?
X'taqbad tgħid?
Aħbarijiet ivvintati
...jew kollha verità?

Ma nafx x'naqbad nemmen
Ma nafx x'naqbad ingħid
Min jgħid li veru
U min jgħid li falz

Oppożizzjoni kollha gdiedem
U Gvern bla mistħija
Kontijiet barra l-gżejjer
U kuntratti moħbija

Politika tal-kappriċċi
Ingravajjet, xalel u pavri
Għax issa aħna Presidenti
Ta' Unjoni li l-Gvern kien ċaħad a tutti i costi!

Imma x'taqbad temmen?
X'taqbad tgħid?
Aħbarijiet ivvintati...
...jew kollha verità?

Jekk għandi s-saħħa
Jekk għandi l-flus
Jekk għandi s-setgħa
U naf indawwar il-fus...
…aktarx ħa temmen lili
U lill-batut ngħajruh li falz
Jista' mhux jikkwota l-Bibbja
Għax tiegħi aktar qawwi l-messaġġ.

Jekk inti komdu b'ta' qanpiena l-ħoss
Id-daqq ta' oħra
M'intx ħa tisma'
M’intx ħa thoss...
Anzi...
Ħa titrekken, ħa ssegwi, ħa xxejjer,
ħa tiddibatti, ma' min tiegħek idoqq.
U tiġġieled, tilletika, tikkumbatti
U żgur mhux ħa temmen...
lil min qanpiena oħra jdoqq.

Il-poter perikoluż
Jitla' dejjem għall-irjus
Tela' f'ta' qablu f'għoxrin sena
U ta' dan far hekk kif dieħla r-raba' sena.

Imma jerga' jitla' m’għandix dubju
Għax l-għadu dgħajjef
U l-poplu korrott...
La fil-but kuntent
Il-moral jista' jindifen anke bl-amment

Jerġa' jitla' ma għandix dubju
Għax...
Għandu s-saħħa
Għandu l-flus
Għandu s-setgħa
U jaf... idawwar il-fus.